Қазақстандық дзюдошы әлем чемпионатында алтын медаль иеленді

Эквадордың Гуаякиль қаласында жасөспірімдер арасында дзюдодан әлем чемпионаты басталды. Жарысқа Қазақстан құрамасы да қатысуда, деп хабарлайды KAZ.NUR.KZ.

Жарыстың алғашқы күнінде Қазақстан құрамасы бес медаль жеңіп алды. Оның ішінде бір алтын, екі күміс және екі қола медаль бар.

60 келіге дейінгі салмақ дәрежесінде Ғабит Расулхан әлем чемпионы атанды. Финалдық белдесуде қазақстандық дзюдошы канадалық Роман Семирозумды жеңді. Осылайша ол құрама қоржынына турнирдің алғашқы алтын медалін салды.

50 келіге дейінгі салмақта сынға түскен Әділжан Нұрбекен және 40 келіге дейінгі салмақтағы Адия Жанахмет әлем чемпионатының күміс жүлдегері атанды.

Ұлттық құрама қоржынына тағы екі медальды Бекарыс Құдайберген мен Ахмет Баубек қосты. Құдайберген 50 келіге дейінгі салмақта қола медаль иеленді. Ал Баубек 60 келіге дейінгі салмақта үшінші орынға ие болды.

Осылайша жарыстың бірінші күнінің қорытындысы бойынша Қазақстан құрамасының еншісінде бес медаль бар: бір алтын, екі күміс және екі қола.

Мәтіннен қате тапсаңыз,бізге жазыңыз