15 жастағы алматылық жасөспірім шахматтан Азия чемпионатының күміс жүлдегері атанды

Алматылық шахматшы, 15 жастағы Мария Холявко 20 жасқа дейінгі қыздар арасында өткен шахматтан Азия чемпионатында күміс жүлдеге ие болды. Бұл туралы қалалық спорт басқармасы хабарлады, деп жазады KAZ.NUR.KZ.

Құрлық біріншілігі 16-26 тамыз аралығында Үндістанның Мумбаи қаласында өткен. Классикалық шахмат бойынша қыздар арасындағы жарысқа Қазақстан, Үндістан, Өзбекстан, Түрікменстан, Шри-Ланка, Непал және Мальдив аралдарынан 66 шахматшы қатысты.

"15 жастағы Мария өзінен жасы үлкен қарсыластармен сынға түсіп, турнирді бірде-бір жеңіліссіз аяқтады. Ол тоғыз партияның бесеуінде жеңіске жетіп, төртеуінде тең ойнап, мүмкін болған 9 ұпайдың 7-еуін жинады", - деп хабарлады ведомство өкілдері Instagram-дағы ресми парақшасында.

Чемпионат қорытындысы бойынша Мария Холявко екінші орын иеленіп, жеңімпаздан небәрі жарты ұпайға қалып қойды. Сондай-ақ турнирдегі нәтижесінің арқасында әйелдер арасындағы халықаралық шебер (WIM) нормасын орындаған.

"Азия чемпионатының күміс жүлдесі 15 жастағы алматылық шахматшының халықаралық деңгейдегі маңызды жетістіктерінің бірі болды", - делінген хабарламада.

Мәтіннен қате тапсаңыз,бізге жазыңыз