"Қазақстан атынан жарысатынымды мақтан тұтамын": Рыбакина тарихи жеңісіне қатысты пікір білдірді

US Open турнирінің ширек финалында тарихи жеңіске жеткен теннисші Елена Рыбакина Қазақстанға оралғаннан кейін не істейтінін айтты. Бұл туралы KAZ.NUR.KZ порталы Championat басылымына сілтеме жасап хабарлады.

Кеше қазақстандық теннисші Елена Рыбакина US Open ширек финалында қытайлық Чжэн Циньвэньді 3:6, 6:1, 6:4 есебімен жеңді. Жартылай финалға шығу арқылы Рыбакина WTA рейтингінде кемінде 8681 ұпай жинады. US Open қорытындысы бойынша спортшы әлемнің бірінші ракеткасы атағына ие болады.

Сондай-ақ Қасым-Жомарт Тоқаев теннисші Елена Рыбакинаны әлемнің бірінші ракеткасы атануымен құттықтады.

US Open турнирінде өткен баспасөз мәслихатында теннисші бұл жетістіктің қазақстандық спорт үшін маңызы зор екенін сөз етті.

"Бұл – тарихи сәт. Мен Қазақстанның атынан жарысатынымды қатты мақтан тұтамын. Қазақстанға әр барған сайын, қай қалаға келсем де, көптеген баланы көремін. Қазір олар теннис ойнап жүр. Теннис алаңдарына келетін балалар саны артып келеді.

Саған көз тіккен жастарды көру – керемет сезім. Бұл өз-өзіңе сеніп, тынбай еңбек етсең, бәрі мүмкін екенін көрсетеді. Қазір әлдене айту қиын, өйткені мен тіпті телефоныма да қарамадым. Әрине көптеген адам құттықтап жатқан болар. Қазір мен Қазақстанда емеспін. Бірақ сол жаққа барғанда алғысымды білдіргім келеді.

Қазақстанға оралу – керемет сезім. Өкінішке қарай, мен ол жаққа жиі бара алмаймын. Дегенмен бұл еліміз үшін зор жетістік деп ойлаймын", - деді Рыбакина.

Мәтіннен қате тапсаңыз,бізге жазыңыз