Тоқаев Дүниежүзілік шахмат олимпиадасының күміс жүлдесін иеленген қазақ қыздарын құттықтады

Мемлекет басшысы Қасым-Жомарт Тоқаев Самарқандта өткен Дүниежүзілік шахмат олимпиадасында екінші орын алған қазақ қыздарын құттықтады. Бұл туралы президенттің кеңесшісі – баспасөз хатшысы Айбек Смадияровқа сілтеме жасаған KAZ.NUR.KZ хабарлайды.

Президент құттықтауында қазақ қыздары әлемдегі ең мықты, әйгілі команда – Қытай құрамасына ғана есе жіберіп, үлкен нәтиже көрсеткенін айтқан.

Сондай-ақ даңқты шахматшы Бибісара Асаубаева бастап барған Қазақстан құрамасы беделді турнирдің бірде-бір ойынында жеңілмегенін атап өткен.

"Мұны шахмат сарапшылары үлкен жетістік ретінде бағалап отыр. Сонымен қатар Қасым-Жомарт Тоқаев біздің шахмат шеберлері өткен олимпиададағы табысты жолын жалғастырғанына назар аударды. Қазақстан командасы сол кезде де екінші орынға табан тіреген еді. Бұл спортшыларымыздың деңгейі биік, талантты, еңбекқор екенін, сондай-ақ отаншылдықты нақты іспен дәлелдей алатынын көрсетеді", - делінген хабарламада.

Мемлекет басшысы шахматшы қыздарға толайым табыс, зор денсаулық және бақ-береке тілеген.

Естеріңізге сала кетейік, Қазақстан құрамасы әйелдер арасындағы Дүниежүзілік шахмат олимпиадасында екінші рет қатарынан күміс жүлдеге ие болды. Соңғы 11-турда ұлттық құрама Польшамен кездесті. Тартысты бәсеке 2:2 есебімен тең аяқталды.

Мәтіннен қате тапсаңыз, бізге жазыңыз