Тәжікстанда Әмір Темірдің өмірі мен қызметі туралы жазылған көне қолжазба табылды (фото)

Тәжікстан аумағынан ұлы қолбасшы Әмір Темірдің өмірі мен қызметі туралы өзбек тілінде жазылған көне қолжазба табылды, деп хабарлайды "ӨзА" ақпараттық агенттігі.

Елдің мәдени мұра агенттігі баспасөз қызметінің мәліметінше, кітаптың соңында қолжазбаның жазылу уақыты хижра күнтүзбесі бойынша 1027 жыл деп көрсетілген. Бұл кезең 1618 жылдың маусым-шілде айларына сәйкес келеді.

Әзірге қолжазбаны кім жазғаны және қайдан көшірілгені белгісіз.

Агенттіктің жазуынша, Душанбеден табылған бұл көне қолжазбаның көшірмесін Өзбекстанға әкеліп, белгілі тарихшы, деректанушы ғалымдардың көмегімен терең зерттеу жұмыстарын жүргізу жоспарланып отыр.

Еске сала кетейік, бұған дейін Моңғолия жерінен екінші Шығыс түрік қағанатының негізін салушы, Құтлық Елтеріс қағанның кешені табылған еді.

Кешенде түркі және соғды жазуындағы мәтіндер бар.

Мәтіннен қате тапсаңыз, бізге жазыңыз