Баскетбол ойнаған Ердоған желіде көпшіліктің назарын аударды (видео)

Түркия президенті Режеп Тайип Ердоғанның баскетбол ойнап, допты себетке бірнеше рет салған видеосы әлеуметтік желіде көп қаралым жинаған, деп жазады KAZ.NUR.KZ.

Видеоны Түркияның өнеркәсіп, сауда, энергетика, табиғи ресурстар, ақпарат және технологиялар комитетінің төрағасы Мұстафа Варанк Twitter-дегі парақшасында жариялады.

Кадрларда президент Режеп Тайып Ердоғанның спорттық шеберлігін көрсетіп жатқаны түсірілген. Сондай-ақ кадрлардан Түркия көшбасшысының өте ширақ қимылдап, бірнеше рет допты себетке дөп салғанын көруге болады.

Twitter-де видеоны көргендер саны 2 миллионнан асқан. Сондай-ақ бейнежазбаға 40 мыңға жуық лүпіл басылып, 1,4 мың пікір жазылған. Ал Instagram желісінде видео 86 мыңнан астам лүпіл жинап, екі мыңнан астам пікір қалдырылған.

Еске салайық, 28 мамырда Түркияда президенттік сайлаудың екінші кезеңі өтіп, Ердоған ресми түрде Түркиядағы президенттік сайлаудың жеңімпазы деп танылған еді.

3 маусымда Анкарадағы түрік парламентінің ғимаратында Режеп Тайип Ердоған Түркия президенті ретінде халқына ант беріп, ресми түрде қызметіне кіріскен болатын.