Рамзан Қадыровтың үлкен қызы Шешенстан үкіметі басшысының орынбасары болады

Рамзан Қадыровтың Шешенстанның Мәдениет министрі болған 24 жастағы үлкен қызы Айшат Қадырова ел үкіметі басшысының орынбасары болып тағайындалады. Бұл туралы Шешенстан басшысы Рамзан Қадыровтың өзі мәлімдеді, деп хабарлайды KAZ.NUR.KZ.

Шешенстан басшысы Рамзан Қадыров өзінің Telegram-дағы ресми арнасында 2 қазанда үкіметте кеңейтілген отырыс өткізіп, Шешенстан Республикасы үкіметінің төрағасы Муслим Хучиев пен парламент төрағасы Магомед Даудовтың есептерін тыңдағанын жазды.

"Кездесу барысында Мүсілім Магомедұлы Шешенстан Республикасының Мәдениет министрі қызметін атқарған Айшат Қадырованы Шешенстан үкіметі төрағасының әлеуметтік блок бойынша орынбасары қызметіне тағайындау туралы ұсыныс жасады.

Мен Муслим Хучиевтің ұсынысын қолдадым. Әрине, Айшат Қадырованың өңірлік Мәдениет министрлігінің қызметін жетілдіруге қосқан үлесі және жинақталған жұмыс тәжірибесі зор", - деді Рамзан Қадыров.

Рамзан Қадыровтың үлкен қызы Айшат Қадырова 1998 жылы 31 желтоқсанда дүниеге келген. Шешенстан мемлекеттік университетін бітірген.

2016 жылдан бастап Айшат Қадырова Firdaws сән үйін басқарды, ал 2020 жылдың қыркүйегінде Шешенстанның Мәдениет министрінің бірінші орынбасары қызметіне тағайындалды.

2021 жылдың қазан айында Айшат Қадырова Мәдениет министрі қызметіне тағайындалды. Ол кезде Рамзан Қадыровтың қызы небәрі 22 жаста болатын.