Израильдіктерге Қазақстанға және басқа да бірқатар елге әзірге бармауға кеңес берілді

Израиль билігі шетелге шығатын израильдіктерге кей мемлекеттерге бармауға кеңес беріп, "қауіп деңгейі жоғары" елдердің тізімін жариялады, деп хабарлайды KAZ.NUR.KZ Израиль Ұлттық қауіпсіздік бас басқармасының ресми сайтына сілтеме жасап.

Израиль Ұлттық қауіпсіздік бас басқармасы "Темір қылыштар" операциясы басталғалы израильдіктердің шетелдегі қауіпсіздік жағдайын үздіксіз бақылағанын мәлімдеді.

2023 жылғы 3 қарашасында израильдіктердің шетелдегі тәртібі туралы нұсқаулықтар жарияланып, бірнеше елде қауіп бары айтылды.

"Біз барлық елге терең талдау жүргізіп, соған сәйкес олардың қауіп-қатер деңгейін сараладық", - деді ведомство өкілдері.

• Батыс Еуропа елдері (Ұлыбритания, Франция және Германияны қоса), Оңтүстік Америка (Бразилия мен Аргентинаны қоса) және Аустралия мен Ресей 2-қауіп деңгейіне дейін көтерілді;
• Африка (Оңтүстік Африка мен Эритреяны қоса) және Орталық Азия елдері (соның ішінде Өзбекстан, Қазақстан, Қырғызстан және Түркіменстан) 3-қауіп деңгейі саналды, бұл елдерге қажетсіз сапарларды қайта қарау ұсынылды.

"Шетелге шығатын израильдік азаматтарға баратын жерлерін дұрыс таңдауды, қайда барса да сақтық шараларын сақтауды және тәртіпке мән беруді ұсынамыз", - деп хабарлады басқарма өкілдері.