Мәскеуге бағыт алған ұшақ Ауғанстанда апатқа ұшырады (видео)

Ауғанстанның Бадахшан провинциясының тауларында ұшақ апатқа ұшырады, деп хабарлайды Паджвак агенттігі Х әлеуметтік желісінде.

"Жексенбіде жергілікті шенеуніктер үнді жолаушылар ұшағы Бадахшанның таулы аймақтарында апатқа ұшырады деп мәлімдеді", - делінген материалда.

Aamaj News агенттігіне сілтеме жасаған ТАСС хабарына сенсек, Мәскеуге бет алған үнді компаниясының ұшағы Ауғанстанның солтүстік-шығысында құлаған. Бадахшан провинциясында әуе кемесі техникалық ақау салдарынан апатқа ұшырады.

Агенттік ұшақтың моделін және борттағы адамдардың болжамды санын атамады.

Росавиация Ауғанстанда жоғалып кеткен Falcon ұшағы Ресей федерациясының Азаматтық әуе кемелерінің мемлекеттік тізілімінде тіркелгенін хабарлады. Алдын ала мәлімет бойынша, бортта 6 адам болған: экипаждың 4 мүшесі және 2 жолаушы.

Қазіргі уақытта ұшақты іздеу жұмыстары жүріп жатыр.

Росавиация хабарына қарағанда, ұшақ Гай (Үндістан) - Ташкент - Жуковский бағыты бойынша чартерлік санитарлық рейс орындаған. 1978 жылы шығарылған ұшақ "Атлетик Групп" ЖШҚ және жеке тұлғаға тиесілі.