Ыстамбұлдағы шіркеуге шабуыл: Ресей мен Тәжікстан азаматтары ұсталды

Түркияның ішкі істер министрі Ыстамбұлдағы католик шіркеуіне жасалған шабуылға қатысты 47 адам ұсталғанын хабарлады. Ұсталғандар арасында шетелдіктер де бар, деп хабарлайды KAZ.NUR.KZ РИА Новостиге сілтеме жасап.

Түркияның Ішкі істер министрлігінің басшысы Әли Ерлікаяның сөзіне сілтеме жасаған басылым өкілдерінің жазуынша, шіркеуге жасалған шабуылдың басты күдіктілері - Ресей мен Тәжікстан азаматтары. Бұл іске қатысы бар 47 адам ұсталды.

Расталмаған мәліметтер бойынша, шіркеуге жасалған шабуылды "Ислам мемлекеті" террористік тобы (Қазақстанда тыйым салынған) өз мойнына алған. Шабуыл жасады деген екі күдікті жексенбіде кешке ұсталды.

"Шіркеуге жасалған шабуылдан кейін бірден полиция кең ауқымды операция бастады. Жексенбіде 30 мекенжайда 47 адам ұсталды," - деді Ерлікая брифингте.

Оның айтуынша, күдіктілер жергілікті уақыт бойынша сағат 22:00-де ұсталған. Олардың бірі Тәжікстан азаматы, екіншісі Ресей азаматы болып шықты.

"Бұл екі шетелдік "Ислам мемлекеті" мүшелері болуы мүмкін", - деді министр.

Ұсталғандардан жауап алу жоспарланып отыр.

Еске салайық, бір күн бұрын жексенбіде Ыстамбұлдың Сарыер ауданындағы Санта-Мария шіркеуінде бетперде таққан белгісіз екі адам ер адамды атып өлтіргені хабарланған болатын.