Камала Харрис ресми түрде АҚШ президенттігіне үміткер атанды

АҚШ вице-президенті Камала Харрис ресми түрде президенттікке үміткер атанды. Ол Демократиялық партия делегаттарынан президенттікке үміткер болу үшін жеткілікті дауыс жинады, деп хабарлайды Washington Post басылымына сілтеме жасаған KAZ.NUR.KZ.

АҚШ вице-президенті Камала Харрис елдегі ең жоғары лауазымға ресми түрде президенттікке үміткер болу үшін онлайн сайлауға қатысқан. Харрис Демократиялық партия делегаттарынан қажет дауыс санын жинаған.

Камала Харрис Америка тарихындағы алғашқы әйел президент болуы мүмкін. Сонымен қатар ол сайлау партиясын басқарған алғашқы қара нәсілді әйел болды.

Ақпаратты Демократиялық партиясының ұлттық комитетінің төрағасы Джейми Харрисон растады. Ол Харрис дауыс беру басталғаннан кейін бір күн өткен соң қажетті дауыс санын жинағанын хабарлады.

Айта кетейік, Барак пен Мишель Обама телефон арқылы сөйлесу кезінде вице-президент Камала Харриске қолдау білдірді.

Сонымен қатар АҚШ президенттігіне үміткер Камала Харрис қарсыласы Дональд Трамппен 10 қыркүйекте дебат өткізуге дайын екенін айтты.

Бұған дейін Камала Харрис АҚШ президенттігіне үміткер болатынын ресми түрде жария еткен болатын.

Мәтіннен қате тапсаңыз, бізге жазыңыз