Макрон Израильді Газа мен Ливандағы операцияларын тоқтатуға шақырды

Франция президенті Эммануэль Макрон Еуроодақ саммитінің қорытындысы бойынша өткен баспасөз мәслихатында Израильден Газа мен Ливандағы операцияларын тоқтатуды сұрады. Бұл жөнінде KAZ.NUR.KZ РИА Новостиге сілтеме жасап хабарлайды.

Франция президенті Израильді саяси диалог құруға шақырды.

"Франция Израильден Ливандағы әскери операцияларын тоқтатуды, жердегі операцияны бастамауды және елдің егемендігін, сондай-ақ БҰҰ алдындағы, атап айтқанда UNIFIL бітімгерлеріне қатысты міндеттемелерін құрметтеуді сұрайды", - деді Макрон.

Макронның айтуынша, ХАМАС басшысы Яхья Синвардың қаза болуы соғысты тоқтатуға мүмкіндік болуы керек.

"Әскери операцияларды, Газада атысты тоқтату келісімін қабылдап, израильдіктер мен палестиналықтарға сенімді саяси перспектива ашу керек", - деп жазды Франция президентінің сөзін жариялаған басылым.

Еске салайық, кеше, 17 қазанда ХАМАС саяси бюросының басшысы Яхье Синвардың қайтыс болғаны туралы ақпарат пайда болды. Ол Газадағы Израиль әскері операциясы кезінде қаза болуы мүмкін екені хабарланған болатын.

Кейін Израиль қорғаныс күштері палестиналық ХАМАС қозғалысының басшысы Яхья Синвардың жойылғанын ресми түрде растады. Израиль Сыртқы істер министрі де осы мәселеге қатысты мәлімдеме жасады.

Кейін АҚШ президенті Джо Байден Газадағы ХАМАС жетекшісі Яхья Синвар өлтірілген операциядан кейін Израиль премьер-министрі Биньямин Нетаньяхуға телефон соғып, құттықтады.

ХАМАС жетекшісі Синвар қаза болғаннан кейін "Хезболла" Израильмен қақтығыстың жаңа кезеңіне өткенін мәлімдеді.

Мәтіннен қате тапсаңыз, бізге жазыңыз