Илон Маск жұмыстан шығарғысы келетін адамдардың аты-жөнін атады

Президент болып сайланған Дональд Трамп миллиардер Илон Маск пен Вивек Рамасвами федералды үкіметті қысқарту жөнінде ұсыныс жасайды деп мәлімдеген. Енді мемлекеттік қызметкерлер әлемнің ең бай адамы мен оны жақтаушылардың сынына ұшыраудан қорқып отыр. Бұл туралы KAZ.NUR.KZ CNN телеарнасына сілтеме жасай отырып хабарлайды.

Өткен аптада Маск Х әлеуметтік желісінде үкіметте климатқа қатысы бар қызметтер атқарып жүрген төрт адамның аты-жөні бар жазбаны қайта бөлісті. Олардың әрқайсын ондаған миллион адам көріп, сын айтушылар көп болды. Кем дегенде бір қызметкер әйел әлеуметтік желідегі аккаунтын өшіргені мәлім.

Федералдық қызметкерлердің бірнешеуі CNN-ге өз өмірі үшін қауіптенетінін айтқан.

"Мұндай тактика федералдық қызметкерлерді қорқытып-үркітуді көздейді", - дейді Америка мемлекеттік қызметкерлер федерациясының президенті Эверетт Келли.

Өткен аптада Маск Х әлеуметтік желісіндегі мәліметтерді бөліскен уақытта "Жалған жұмыс орындары қаптап кетіпті" деп жазды. Оның бұл пікірін 33 миллионнан аса аккаунт көріп, миллиардерден мұндай тиімсіз қызметтерді қысқартуды сұраған.

Маск бұған дейін де осындай әдіске жүгінген, сол кезде оның мұндай әрекеті адамдардың өміріне қауіп төндірген, деп жазды CNN.

Миллиардерге қарасты Х әлеуметтік желісі телеарна сауалдарына жауап бермеген.

Ал Вивек Рамасвами болса CNN-ге "Біздің қарсыласымыз – нақты бір адам емес. Біздің қарсыласымыз - бюрократия" деп жауап берген.

Мәтіннен қате тапсаңыз, бізге жазыңыз