Джо Байден уәдесіне қарамастан ұлына рақымшылық жасады

АҚШ президенті Джо Байден қару-жараққа қатысты заңбұзушылық, салықтан жалтару баптарымен айыпталған ұлы Хантер Байденге ресми түрде рақымшылық жариялады. Бұл туралы KAZ.NUR.KZ CNN арнасына сілтеме жасап хабарлайды.

Басылым мәліметінше, жексенбі, желтоқсанның бірі күні Джо Байден ұлына рақымшылық жасау туралы бұйрыққа қол қойғанын мәлімдеді. Бұл шешімді келесі айдан бастап Ақ үйді басқаратын Дональд Трамп қайтара алмайды.

Байденнің бұл әрекеті оның сайлау алдында бірнеше рет берген уәделеріне қайшы келеді. Президент пен оның Ақ үйдегі жоғарғы өкілі бұған дейін ұлына кешірім жасамайтынын және қандай жағдай болмасын сот әділдігіне араласпайтынын мәлімдеген болатын.

"Рақымшылық жасау Хантер Байденнің жасаған қылмысы үшін сотталмайтынын білдіреді және оның түрмеге қамалу мүмкіндігін жояды. Енді Хантер Байденге қатысты сот процестері, оның ішінде 12 желтоқсанға жоспарланған қару-жарақ ісі және 16 желтоқсанда қаралуға тиіс салық ісі тоқтатылуы мүмкін", - деп түсіндіреді материал авторлары.

Байден өз шешімін ұлының "әділетсіз түрде жауапқа тартылғанын" және "Хантерге ұқсас қылмыс жасаған адамдарға қарағанда басқаша көзқарас" болғанын айтып түсіндірді. Президент оның Конгресстегі саяси қарсыластары әдейі сайлау алды науқанына қарсы шығып, жалған айып таққанын хабарлады.

"Америкалықтар әке мен президенттің неліктен мұндай шешім қабылдағанын түсінеді деп үміттенемін", - деді Байден өз мәлімдемесінде.

Мәтіннен қате тапсаңыз, бізге жазыңыз