Лукашенко Беларусьте ядролық қару бар екенін растады

Александр Лукашенко БелТА мемлекеттік агенттігіне берген сұқбатында Беларусьте ядролық қару бар екенін растады. Бұл туралы KAZ.NUR.KZ "БелТА" агенттігіне сілтеме жасай отырып хабарлайды.

Лукашенконың айтуынша, Беларуське ядролық оқтұмсықтар әкелінген.

"Мен осында ядролық оқтұмсықтар алып келдім. Он ғана емес, одан көп. Адамдар оны әзілге балап, ешкім ештеңе әкелген жоқ деп тұр. Әкелдік. Ал оны әзілге балап жүргендердің өздері көз жазып қалған. Олар біздің (ядролық қаруды – ред. ескертпесі) қалай әкелгенімізді де сезбей қалды", - деп мәлімдеді ол.

Лукашенко ядролық қару емес, бірақ өте қуатты ресейлік "Орешник" зымыран кешенін де Беларусьқа орналастыру жоспары туралы сауалға жауап берді.

"Ядролық қару қолданудың жауапкершілігі көп. Хиросимо, Нагасакиден кейін (1945 жылы АҚШ Жапонияның екі қаласына ядролық бомба тастаған – ред. ескертпесі) ешкім ядролық қару тетігін басқан жоқ. Беларусьті былай қойғанда, алпауыт мемлекеттердің өзінің батылы бармады. Бірақ мен жауларымның, достарым мен қарсыластарымның бәріне ескерттім: сендер мемлекеттік шекарадан аттайтын болсаңдар, бірден қарымта жауапқа тап боласыңдар. Мен оның ядролық не басқа қару екеніне қарап жатпаймын", - дейді Лукашенко.

Беларусь басшысы ядролық қарудың қысқаша сипаттамасын айтып берді.

"Біз ресейліктермен олар бізге ядролық қаруды қайтарғанға дейін шарттасқанбыз. Біз оларға стратегиялық қару бергенбіз. Ал мынау тактикалық ядролық қару. Соның өзінде әлгі "Орешниктен" бес есе қуатты болса керек", - деп сипаттады Беларусь басшысы.