Өзбекстанда жекеменшік зообақ күзетшісіне арыстандар шабуыл жасады

Өзбекстанда Ташкент облысындағы жекеменшік Lion Park хайуанаттар бағында үш арыстан құлпы ашық қалған тордан шығып, күзетшіге шабуыл жасаған. 44 жастағы қызметкер алған жарақаттарынан қайтыс болды. Бұл туралы KAZ.NUR.KZ "Газете.uz" порталына сілтеме жасап хабарлайды.

Оқиға 17 желтоқсан күні таңғы сағат 5:00 шамасында Ташкент облысы Паркент ауданы "Файзиобод" махалласы аумағындағы жекеменшік Lion Park хайуанаттар бағында болған.

Үш африкалық арыстан тор есігінің ашық екенін пайдаланып, бостандыққа шыққан.

Арыстандарды қайта торға кіргізбек болған қызметкерге жыртқыштар шабуыл жасап, ауыр жарақат салған. Күзетші оқиға орнында көз жұмды.

Төтенше жағдайды зообақ қызметкерлері сағат 9:00-де анықтады. Ұйықтататын дәрілер көмегімен екі арыстан торға қайтарылды.

Сағат 10:00-де оқиға орнына аудандық ішкі істер бөлімінің кезекші тобы, аудан прокуроры, аудандық прокуратураның тергеушісі, облыстық табиғатты қорғау басқармасының қызметкерлері, сондай-ақ полиция бөлімінің арнайы қарулы жасағы келді.

Сот-медициналық және ДНҚ сараптамалары тағайындалды.

Сонымен қатар зообақтағы барлық жыртқыш аңдардың торлары тексерілді.