Ақтау маңында ұшақ апаты: ИКАО Қазақстанға сарапшысын жіберуге дайын екенін жеткізді

Халықаралық азаматтық авиация ұйымы Ақтау маңында болған ұшақ апатына байланысты мәлімдеме жасады. Бұл туралы ИКАО-ға сілтеме жасаған KAZ.NUR.KZ хабарлайды.

ИКАО өкілдері өз мәлімдемесінде Халықаралық азаматтық авиация туралы конвенцияға (Чикаго конвенциясы) 13-қосымшаны еске салды. Құжаттарға сәйкес, ұйым мүшелері жан-жақты және тәуелсіз тергеуді қолдау үшін толық ынтымақтастық танытуға тиіс.

"Осы халықаралық азаматтық авиация стандарттары зардап шеккен барлық мемлекеттің шақыруымен тәуелсіз тергеу жүргізуді талап етеді. Тергеушілерге жазатайым оқиғаға қатысты барлық ақпаратты анықтау және осы қайғылы оқиғаны тудырған немесе себеп болған фактілер мен қауіпсіздікке қатысты кез келген ықтимал факторлар туралы хабарлау міндеті жүктелген. Оларға, сондай-ақ, шығарған қорытындысы негізінде тиісті қауіпсіздік шараларын ұсынуға кеңес беріледі.

Авиациялық қауіпсіздік пен қауіпсіздік мүддесі үшін ИКАО халықаралық тергеу тобының құрамында бақылаушы ретінде қызмет ету үшін ИКАО сарапшысын жіберу арқылы осы тергеуді қолдауға дайын", - делінген хабарламада.

Сондай-ақ ұйым өкілдері барлық мүдделі мемлекет пен қызмет көрсетушілерді "тергеу процесіндегі толық әріптестік аясында барлық ақпарат пен жазбаны қорғауға" шақырды.

"Қатысуға құқығы бар мемлекеттер – пайдаланушы мемлекет, әуе кемесін тіркеген мемлекет, оны құрастырған және шығарушы мемлекет (ұшақ және қозғалтқыштар), сондай-ақ азаматтары қаза болған немесе ауыр жарақат алған мемлекеттер.

13-қосымшаға сәйкес, тергеу тек қауіпсіздік деректері мен ақпаратты жинау және талдау арқылы болашақ апаттар мен оқыс оқиғалардың алдын алу мақсатында жүргізіледі. 13-қосымшада алдын ала есепті жазатайым оқиғадан кейін 30 күн ішінде дайындау және соңғы есепті 12 ай ішінде ұсыну талап етілген", - дейді ИКАО өкілдері.