Нью-Йорк тұрғындары көлік кептелісі аумағына кіргені үшін ақша төлейтін болды

5 қаңтардан бастап Нью-Йорктің ең тығыз орналасқан ауданы – Манхэттенге көлік кептелісі күшейген уақытта жеңіл автокөлікпен кіргендерден 9 доллар ақы алынады. Билік осы әрекеті арқылы жолды тәулігіне 80 мың автокөліктен босатуды көздейді. Бұл туралы KAZ.NUR.KZ BBC-дің Орыс қызметіне сілтеме жасай отырып хабарлайды.

Басылым мәліметінше, Нью-Йорктің автокөлігі көп аудандарына кіру ақысы уақыт пен көлік түріне қарай есептеледі. Түнде 2,25 доллардан басталып, ал көлік кептелісі көп болатын күндіз 9 долларға дейін көтеріледі. Қала билігі осы тарифті 2028 жылға дейін ұстап тұруды көздеп отыр, одан кейін ақы тағы өседі.

"Жолдарды кептелістен арылту аймағына Манхэттеннен оңтүстікке қарай 60-көшеден басталады. Оған Эмпайр-стейт-билдинг, Таймс-сквер және Уолл-стрит те кіреді".

Мұндай қадам Нью-Йорк қаласын жолдардағы кептелістерден арылту мақсатында қабылданған. Тағы бір мақсат – жиналған ақшаға қоғамдық көлік жүйесін дамыту.

Нью-Йорк штатының губернаторы Кэти Хокул қаланың көлік көп жүретін аудандарына кіруге ақы енгізуді екі жыл бұрын ұсынған.

Мұндай ережеге қала таксишілері қауымдастығы мен АҚШ-тың жаңа сайланған президенті Дональд Трамп қарсы шығып отыр. Трамп қайта президент болған уақытта мұндай жүйені алып тастауға уәде берген.

INRIX компаниясының мәліметінше, Нью-Йорк қаласы әлемде жолдары кептеліске толы мегаполистер тізімінде екі жыл қатарынан бірінші орын алған.