Трамп АҚШ-ты ДДСҰ-дан шығару туралы жарлыққа қол қойды

Дональд Трамп инаугурациядан кейін АҚШ-тың Дүниежүзілік денсаулық сақтау ұйымынан шығуы туралы жарлыққа қол қойды, деп хабарлайды CNN арнасына сілтеме жасаған KAZ.NUR.KZ.

Телеарнаның хабарлауынша, АҚШ-тың ДДСҰ-дан шығуы Трамп президенттігінің алғашқы күнінде-ақ БҰҰ-мен байланысты үзу жолындағы маңызды қадам болады.

Жарлықта АҚШ-тың ұйымнан шығуының себептері ретінде ұйымның "COVID-19 пандемиясына және денсаулық сақтаудың басқа да жаһандық дағдарыстарына қатысты дұрыс әрекет етпеуі, шұғыл қажет реформаларды жүзеге асыру қолынан келмегендігі және ДДСҰ-ға мүше мемлекеттердің заңсыз саяси ықпалынан тәуелсіздігін көрсете алмағандығы" келтірілген.

"Бұл маңызды мәселе", - деді Трамп көмекшісіне жарлыққа қол қойған сәтінде. Ол АҚШ ұйымға басқа елдермен салыстырғанда тым көп ақша төлейді деп санайтынын жасырмады.

Сондай-ақ шешімде ДДСҰ "АҚШ-тан әділетсіз әрі салмақ түсіретін төлемдерді талап етуді жалғастырып жатыр" делінген.

Телеарна түсініктеме алу үшін ДДСҰ-ға хабарласты.

Дүниежүзілік денсаулық сақтау ұйымы (ДДСҰ) өз ресми сайтында атап өткендей, барлық адамның әл-ауқатын сақтауға ұмтылады және ғылымның жетістіктерін басшылыққа ала отырып, әрбір адамға, барлық жерде, қауіпсіз әрі салауатты өмір сүруге тең мүмкіндік беру үшін жаһандық күш-жігерді бағыттайды және шабыттандырады.

Ол 1948 жылы Біріккен Ұлттар Ұйымының мамандандырылған мекемесі ретінде құрылған.

Айта кетейік, ДДСҰ қаржыландыруды екі негізгі көзден алады: мүше мемлекеттер төлейтін есептелген жарналар (елдің мүшелік жарналары) және мүше мемлекеттер мен басқа серіктестер төлейтін ерікті жарналар.

Мәтіннен қате тапсаңыз, бізге жазыңыз