Ресей мен АҚШ делегациясы Сауд Арабиясында келіссөз жүргізуді бастады (фото, видео)

Ресей делегациясы АҚШ өкілдерімен келіссөз жүргізу үшін Эр-Риядқа барды, деп хабарлайды Ресей Сыртқы істер министрлігіне сілтеме жасаған KAZ.NUR.KZ.

Ресей Федерациясының Сыртқы істер министрлігі Telegram-дағы арнасында Ресей делегациясының АҚШ өкілдерімен келіссөздер жүргізу үшін Эр-Риядқа барғанын хабарлады.

РИА Новости агенттігінің хабарлауынша, екі ел өкілдері король әулетінің сарайларының бірі – Албасатин кешеніндегі Дирия сарайында кездесті.

РБК мәліметінше, ресейлік тараптан Ресей президентінің көмекшісі Юрий Ушаков пен сыртқы істер министрі Сергей Лавров келген. Келіссөзге Ресейдің тікелей инвестиция қорының басшысы Кирилл Дмитриев те қатысып жатыр.

Ал америкалық тараптан АҚШ мемлекеттік хатшысы Марко Рубио, АҚШ президенті Дональд Трамптың ұлттық қауіпсіздік жөніндегі кеңесшісі Майк Уолц және Ақ үйдің Таяу Шығыстағы өкілі Стив Виткофф бар.

Келіссөзге, сонымен қатар Сауд Арабиясының Сыртқы істер министрі Фейсал бен Фархан Әл Сауд пен Сауд Арабиясының ұлттық қауіпсіздік жөніндегі кеңесшісі Мусаид бен Мұхаммед әл-Айбан қатысып отыр.