1000-нан астам адам қаза тапты: Мьянмадағы жойқын жер сілкінісінен кейінгі кадрлар (фото)

Мьянмада 28 наурызда болған жойқын жер сілкінісінен қаза тапқандар саны 1002-ге жетті. Бұл туралы Қытайдың орталық телеарнасы (CCTV) хабарлады, деп жазады KAZ.NUR.KZ.

Телеарна мәліметіне сәйкес, тағы 2376 адам жарақат алған.

Жойқын жер сілкінісінен кейін түсірілген кадрлар РИА Новостидің Telegram-арнасында пайда болды, сондай-ақ табиғи апаттың салдарын Facebook-те Мьянма өрт күзеті департаменті де көрсетті.

Естеріңізге сала кетейік, 28 наурызда Мьянмада жойқын жер сілкінісі болды. АҚШ Геологиялық қызметінің мәліметінше, жер сілкінісінің магнитудасы – 7,7.

Бұдан кейін магнитудасы 6,4 болатын тағы бір жерасты дүмпуі тіркелген. Жер сілкінісі Таиланд астанасы Бангкокта да сезілген.

Мьянмада болған жойқын жер сілкінісінің салдарынан ұзындығы бір шақырымнан асатын көпір опырылып түсті. Кейін Мьянмада төтенше жағдай жарияланды.

Қазақстан президенті Қасым-Жомарт Тоқаев Мьянма премьер-министріне қайғылы жағдайға байланысты көңіл айтты.