Израиль Иранға соққы жасады: елде ТЖ жарияланып, Қорғаныс министрлігі мәлімдеме жасады

Израиль әскері Иранға соққы жасады - БАҚ Тегеранда жарылыстар болғаны туралы жазып жатыр. Израиль қорғаныс министрі Кац мәлімдеме жасады, АҚШ бұл жағдайға жауап қатты.

Өз дереккөздеріне сілтеме жасап жазған Axios мәліметіне сәйкес, бейсенбі, 12 маусымда Израиль әуе күштері Иранға соққы жасады. Израильдің нені мақсат етіп отырғаны әзірге белгісіз, бірақ БАҚ Тегеранда жарылыстар болғаны туралы жазып жатыр.

"Израиль Америка Құрама Штаттарының ешбір айқын қолдауынсыз өзінің ең үлкен әрі ең жақсы қаруланған қарсыласына тікелей шабуыл жасап жатыр", - делінген мақалада.

Израильдің соққылары Израиль үшін де, Иран үшін де үлкен қауіп төндіретін әскери қақтығыстың бастамасы болуы мүмкін, деп атап өтті басылым.

АҚШ президенті Дональд Трамп Израильдің Иранның ядролық нысандарына жасаған шабуылына ашық түрде қарсы шығып, әлі де болса Иранмен ядролық келісімге келу мүмкін деп санайтынын айтты.

РБК Израильде төтенше жағдай жарияланғанын жазды.

Израиль қорғаныс күштері (ЦАХАЛ) өз Telegram арнасында нұсқаулық шығарды, оған сәйкес бүкіл елде сағат 3:00-ден бастап жиындарға, білім беруге және кәсіпорындардың жұмысына тыйым салынады. Израиль аймағында дабыл сиреналары естілуде.

"Қоғам тылдағы қолбасшылықтың ресми арналарында жарияланған ұсыныстарына сәйкес әрекет етуі керек", - делінген ЦАХАЛ хабарламасында.

The Times of Israel Израиль армиясының мәлімдемесіне сілтеме жасап хабарлағандай, Израиль әскери-әуе күштері Иранның ядролық бағдарламасы мен басқа да әскери нысандарына қатысы бар ондаған нысанаға соққы жасады.

Израиль қорғаныс армиясы Иранда бірнеше күн ішінде бірнеше бомба жасау үшін жеткілікті байытылған уран бар болғандықтан, Израиль "анық төнген бұл қауіпке" қарсы әрекет етуі керек деп мәлімдеді.

Басылымның хабарлауынша, аз уақыт бұрын Израильде естілген сиреналар – Иранның ықтимал жауабын күту үшін Израиль қорғаныс күштері берген ескертуі.

Премьер-министр Биньямин Нетаньяху қауіпсіздік кеңесін шақырды, ал Израиль қорғаныс министрі Исраэль Кац бүкіл елде төтенше жағдай жариялады.

"Израильдің Иранға алдын ала соққы беруінен кейін жақын арада Израиль мемлекеті мен оның бейбіт тұрғындарына зымыран мен ұшқышсыз шабуыл жасалады деп күтілуде", - деді Кац.

Айта кетейік, АҚШ Мемлекеттік хатшысы Марко Рубио АҚШ-қа бұл шабуыл туралы ескертілгенін, бірақ АҚШ оған қатыспағанын мәлімдеген.

"Израиль бізге бұл әрекеттерді өзін-өзі қорғау үшін қажет деп санайтынын айтты. Президент Трамп пен әкімшілік күштерімізді қорғау және аймақтық серіктестерімізбен тығыз байланыста болу үшін барлық қажетті қадамды жасады.

Ашық айтайын: Иран АҚШ мүдделеріне немесе қызметкерлеріне шабуыл жасамағаны абзал", - деп қосты Мемлекеттік департамент басшысы.

Мәтіннен қате тапсаңыз, бізге жазыңыз