БАӘ Сыртқы істер министрлігі Иранға наразылық нотасын жолдады

БАӘ Сыртқы істер министрлігі ел аумағына жасалған шабуылдарға байланысты Иран елшісі Реза Америді Иранға наразылық нотасын тапсыру үшін шақырды, деп хабарлайды KAZ.NUR.KZ.

Біріккен Араб Әмірліктері Сыртқы істер министрлігінің ресми сайтының хабарлауынша, министрлік Иран Ислам Республикасының БАӘ-дегі елшісі Реза Америді шақырып, оған қатаң түрде наразылық нотасын тапсырды.

"БАӘ Иранның террористік әрекеттері мен шабуылдарын барынша қатаң айыптайды.

БАӘ аумағына жасалған шабуылдар елдің егемендігін өрескел бұзу, ұлттық қауіпсіздікке төнген қатер және барлық халықаралық конвенцияның, қарарлардың және белгіленген нормалардың айқын бұзылуы болып саналады", - делінген нотада.

БАӘ Сыртқы істер министрі Халифа Шахин Әл-Марар Иран үкіметінің бейбіт тұрғындарға қауіп төндіретін, азаматтық нысандарға, оның ішінде тұрғын үй аудандарына, әуежайларға, порттарға және қызмет көрсету нысандарына қарсы дұшпандық эскалациясы ақталмайтынын немесе кешірім берілмейтінін үзілді-кесілді айтты.

"Бұл БАӘ аумағы ешқандай әскери әрекеттерге пайдаланылмайтыны туралы елдің айқын ұстанымына қайшы күрделі әрі жауапсыз эскалация.

Шабуылдар тату көрші қағидаттарына және Біріккен Ұлттар Ұйымының Жарғысына қайшы келеді және БАӘ Иранмен қарым-қатынаста үнемі жүргізіп келе жатқан шиеленісті азайту және бейбіт шешімдер жолына кедергі келтіреді", - деп мәлімдеді БАӘ СІМ.

БАӘ сыртқы істер министрі екіжақты қарым-қатынастарға ауыр зардабы тиетінін, бұл саяси, экономикалық және сауда деңгейлеріне тікелей әсер ететіні туралы ескертті.

Ол сондай-ақ БАӘ-нің егемендікті құрметтеу және шабуылдарды дереу және сөзсіз тоқтату талабын атап өтті және БАӘ өзінің заңды құқықтарына толық сәйкес жауап беру құқығын өзінде қалдыратынын қайта еске салды.

Мәтіннен қате тапсаңыз, бізге жазыңыз