Вашингтондағы кешкі ас кезінде атылған оқтан кейін Трамп пен оның жұбайы эвакуацияланды

АҚШ президенті Дональд Трамп, оның әйелі, әкімшіліктің басқа да қызметкерлері, сондай-ақ Конгресс мүшелері Ақ үй жанындағы тілшілер қауымдастығының жыл сайынғы кешкі асы кезінде залдан эвакуацияланды. Оған себеп - ғимараттан атыстың естілуі, деп хабарлайды KAZ.NUR.KZ.

Қазақпарат мәліметінше, жарақат алғандар туралы хабарламалар түскен жоқ.

АҚШ-тың Құпия қызметі мен құқық қорғау органдары адамдарды залдан шығарып, жағдайды бақылауға алды. Куәгерлердің айтуынша, көп адам үстелдердің астына тығылды.

Оқиға Вашингтондағы Hilton қонақүйінде болған, мұнда дәстүр бойынша жыл сайын саясаткерлер, журналистер мен қоғам қайраткерлерінің қатысуымен кешкі ас өтеді. Трамптың шараға қатысуы оның әкімшілігі мен бұқаралық ақпарат құралдары арасындағы шиеленіскен қарым-қатынастар аясында ерекше назар аударды.

Жыл сайынғы кеш әлі де болса, журналистер мен билік өкілдері арасындағы бейресми қарым-қатынас шекаралары туралы пікірталас туғызады. The New York Times сияқты бірнеше басылым мұндай шараларға қатысудан бас тартты, себебі олар бұл кездесулерді орынсыз деп санайды.

Кеш алдында 500-ге жуық бұрынғы журналист баспасөз бостандығына қысым көрсетуге қарсы қатал жауап беру туралы үндеу жасады. Ал көп репортер бұл кешті кәсіби қарым-қатынас орнатып, жұмыс байланыстарын нығайту үшін жақсы мүмкіндік деп санайды.

Мәтіннен қате тапсаңыз, бізге жазыңыз