Филиппиндегі мектептегі атыс болып, алты оқушы қаза тапты

Филиппиннің оңтүстігіндегі мектепте атыс болып, салдарынан алты адам қаза тауып, тағы 17 адам жарақат алды. Қаза тапқандардың арасында күдікті де бар, деп хабарлайды Anadolu агенттігіне сілтеме жасаған KAZ.NUR.KZ.

Атыс жұма күні Филиппиннің Оңтүстік Котабато провинциясындағы Банга қаласында орналасқан Банга ұлттық орта мектебінде болған.

"Елдің Әлеуметтік қамсыздандыру және даму департаментінің мәліметінше, кем дегенде алты адам қаза тауып, 17 адам жарақат алған. Болжам бойынша, оқ атқан адам осы мектептің оқушысы болған. Оның да қаза тапқаны айтылды", - делінген жарияланымда.

Оқиғадан кейін Банга қаласындағы барлық білім беру мекемесінде сабақ уақытша тоқтатылған. Бұл туралы Табиғи апаттар қаупін азайту және төтенше жағдайларды басқару жөніндегі муниципалдық басқарма хабарлаған.

Білім министрлігі оқиғаға байланысты алаңдаушылық білдіріп, мектеп әкімшілігімен, жергілікті билікпен және құқық қорғау органдарымен бірлесіп жұмыс істеп жатқанын мәлімдеді.

"Біз үшін оқушыларымыздың, мұғалімдеріміз бен мектеп қызметкерлерінің қауіпсіздігі мен амандығы маңызды", - деп мәлімдеді ведомство.

Оқиғадан зардап шеккендерге және қайғылы жағдай әсер еткен басқа да адамдарға психологиялық көмек көрсетілетіні хабарланды.

"Сондай-ақ Білім министрлігі билік оқиғаның мән-жайын анықтағанға дейін тексерілмеген ақпаратты таратпауға шақырды. Жұма күнгі атыстың ықтимал себебі әзірге жарияланған жоқ", - деп толықтырды басылым.

Мәтіннен қате тапсаңыз,бізге жазыңыз