Джибутиде қайық суға батып кетті: 139 мигрант опат болды, 84 адам жоғалды

Джибутиден Йеменге бет алған 305 жолаушысы бар қайық суға батып, кемінде 139 адам қаза болды. Бұл туралы KAZ.NUR.KZ БҰҰ-ның халықаралық көші-қон ұйымына сілтеме жасап хабарлайды.

Халықаралық көші-қон ұйымының мәліметінше, жолаушылар қайығы 8 қазаннан 9 қазанға қараған түні Джибути жағалауында, Обоктан солтүстікке қарай орналасқан Гехере ауданында суға кетті. Оқиға салдарынан кемінде 139 мигрант қаза тауып, тағы 84 адам із-түссіз жоғалғандар қатарында деп саналады.

Ұйым дерегінше, бұл кеме апаты Шығыс бағытындағы ең ірі қайғылы оқиғалардың бірі болып отыр.

"Егер басқа қауіпсіз жол жоқ екеніне көзі жетпесе, ешкім мұндай қайыққа отырмайды. Біз мұндай өлімдерге бұдан былай қалыпты жағдай ретінде қарай алмаймыз. Қауіпсіз және заңды жолдар адам өмірін сақтап қалады. Мен үкіметтерді келесі қайық суға кетпей тұрып, шара қолдануға шақырамын", - деді Халықаралық көші-қон ұйымының бас директоры Эми Поуп.

Джибути билігі іздеу-құтқару операциясын жалғастыруда. Халықаралық ұйым Обоктағы Көші-қон жағдайларына ден қою орталығында зардап шеккендерге шұғыл көмек көрсетуде: медициналық көмек, психоәлеуметтік қолдау, тамақ, баспана және қорғау қызметтері ұсынылуда.

Мәтіннен қате тапсаңыз, бізге жазыңыз