Измирдегі жер сілкінісі салдарынан көз жұмғандар саны 43-ге жетті

Измирдегі жер сілкінісінен қаза тапқандардың саны 43-ке дейін артқаны белгілі болды деп хабарлайды Анадолы.

Түркиядағы ішкі істер министрлігінің апаттар және төтенше жағдайларды басқару жөніндегі басқармасы (AFAD) Измирдегі жер сілкінісінен қаза тапқандардың саны 43-ке дейін артқаны туралы мәлімдеді.

AFAD жасаған мәлімдемеде жер сілкінісінен кейін сағат 07:00-дегі жағдай бойынша 812 жер дүмпуі болғандығы, оның 40-ының күші 4 баллдан жоғары болғандығы айтылды.

Денсаулық сақтау саласындағы апаттарды үйлестіру орталығынан (SAKOM) алынған ақпаратқа сәйкес, жер сілкінісі салдарынан 43 азамат қайтыс болған. Оның 1-еуі суға батып, көз жұмған. Жарақат алған 896 адамның 667-сі жазылып, 229 адамға ем алуын жалғастырып жатқаны белгілі болды.

Еске салсақ, 31 қазан Грекия мен Түркияда жойқын жер сілкінісі болғаны туралы жазған болатынбыз.

Бұған дейін Түркиядағы жер сілкінісінен қаза тапқандар саны 24 адамға жеткені туралы жазған едік.

Сондай-ақ, Грекия мен Түркиядағы жойқын жер сілкінісіне байланысты Қазақстанның Түркиядағы елшісі Абзал Сапарбекұлы мәлімдеме жасаған еді.

Сонымен қатар, Жойқын жер сілкінісінен туындаған цунами Түркияның Измир қаласындағы үйлерді қиратты. Оқиға орнынан алғашқы кадрлар пайда болды.

Кадрлардан Измир көшелерін су басқанын, жиһаздардың, үйдің қирандылары мен өзге де заттардың сумен ағып бара жатқанын көруге болады.

Мәтіннен қате тапсаңыз, бізге жазыңыз