"Көлігі аударылған": Павлодар облысы әкімінің бірінші орынбасары жол апатына түсті

Павлодар облысы әкімінің бірінші орынбасары Серік Батырғожинов жол-көлік оқиғасына ұшырады. Жол апаты автобус карьерге құлап кеткен Майқайың кен орнынан қайтып келе жатқанда болған, деп хабарлайды KAZ.NUR.KZ.

Облыс әкімінің баспасөз қызметі өкілдері бұл оқиға 9 қаңтарда болғанын айтты. Серік Батырғожинов қызметтік көлігімен автобус құлаған жерден Павлодарға жолға шыққан.

"Жол-көлік оқиғасында басқа көліктер бүлінген жоқ. Қазір жолда мұзтайғақ, ауа райы қолайсыз, көлік жол жиегіне шығып кетіп, аударылды. Әкімнің бірінші орынбасары ауыр жарақат алған жоқ, бірақ ауруханаға жүгінді", - деді әкімнің баспасөз хатшысы Салтанат Әкімбекова.

Өңірлік ПД өкілдері бұл дерек полицияда тіркелмегенін хабарлады.

Еске салайық, Серік Батырғожинов 2023 жылдың қараша айында Павлодар облысы әкімінің бірінші орынбасары болып тағайындалған. Қазіргі уақытта 59 жастағы шенеунік "Майқайыңалтын" аумағындағы апаттан автобус пен құтқарушыларды іздеу жөніндегі жедел штаб құрамында.

Карьерге құлаған автобус оқиғасы

Еске салайық, Павлодар облысында 4 қаңтарға қараған түні Майқайың кеніші шахтасының жанында автобус карьерге құлап кетіп, екі адам қаза тапқан еді. Олардың денесі жер бетіне шығарылды.

Облыс әкімі Асайын Байхановтың айтуынша, автобуста 4 адам болған - Кәсіби әскерилендірілген авариялық-құтқару қызметтерінің республикалық орталық штабының Павлодар филиалының 3 қызметкері мен автобус жүргізушісі.

5 қаңтарда Асайын Байханов оқиға орнынан видео жариялады.

Павлодар облыстық полициясы "Майқайыңалтын" АҚ аумағындағы апатқа қатысты тергеуді бастады. Кейін Павлодар облысы төтенше жағдайлар департаменті автобус құлап кеткен "Майқайыңналтын" АҚ аумағында жүргізіліп жатқан іздеу-құтқару жұмыстарының барысы туралы баяндады.