Қарағанды облысында боранда 18 сағат бойы адасып жүрген әйел мен бала табылды (видео)

Әйел мен жеті жасар бала қыстың көзі қырауда 18 сағат айдалада адасып жүрген. Бұл туралы Қарағанды ​​облысының төтенше жағдайлар департаментіне сілтеме жасаған KAZ.NUR.KZ хабарлайды.

Ведомствоның Instagram-дағы ресми парақшасында жарияланған ақпарат бойынша, бүгін түнде Ақтоғай ауданы Айыртас ауылында төтенше жағдайлар департаменті күштері белгісіз бағытқа кеткен 1993 жылы туған әйел мен 2017 жылы туған баланы іздестірді.

Олар үйінен 7 ақпан күні сағат 14:00 шамасында шығып кеткен.

Сағат 08:50-де іздестіру тобы жоғалып кеткен әйел мен баланы Айыртас ауылынан батысқа қарай 6 шақырым жерден тапты.

Құтқарылғандар Ақтоғай ауданының орталық ауруханасына жеткізілді.

"Ауа райы болжамын қадағалаңыздар. Қолайсыз ауа райында, қарлы боран кезінде үйден шығу қауіпті", - дейді құтқарушылар.