Алматы әуежайында ұшқыш есірткіге мас күйде ұсталды: Air Astana компаниясы түсініктеме берді

Air Astana әуекомпаниясының баспасөз қызметі Алматы әуежайында есірткіге мас күйде ұсталған ұшқыш жөнінде тараған ақпаратқа пікір білдірді. Бұл туралы KAZ.NUR.KZ хабарлайды.

"23 сәуірде Алматы әуежайында жолаушы ретінде ұшып келе жатқан әуекомпания ұшқышы есірткіге мас күйінде ұсталды. Қазіргі уақытта полиция сотқа дейінгі тергеу амалдарын жүргізіп жатыр. Бұл қызметкер жұмыстан шеттетілді.

Қауіпсіздік біздің басты міндетіміз болғандықтан, әуекомпания қызметкерлердің ішімдік немесе есірткі тұтынуын мүлде құптамайды. Әуекомпанияда экипаждардың қанында алкоголь немесе есірткі бар-жоғы үнемі тексеріліп отырады", - делінген Air Astana баспасөз қызметінің хабарламасында.