Көкшетауда неке қидырған күні жас жігіт кісі қолынан қаза тапты (видео)

Көкшетауда қаладағы мекемелердің бірінде 22 жастағы жігіт көз жұмды. Полиция тергеуді бастады, деп хабарлайды Sinegor.kz сайтына сілтеме жасаған KAZ.NUR.KZ.

Қайтыс болған 22 жастағы жігіттің туыстары Sinegor.kz тілшісіне қайғылы жағдайдың мән-жайын айтып берді. Олар кінәлілерді жазалауды сұрайды.

"Небәрі 22 жаста болған жас жігіт неке қиған күні қайтыс болды. Туыстары кінәлілер жазадан құтылып кете ме деп қорқады. Сондықтан кезінде Ішкі істер министрі басшысы болған Ақмола облысының әкімі бұл істі өз бақылауына алғанын қалайды", - делінген басылым ақпаратында.

Ақмола облысының полиция департаменті өкілі NUR.KZ тілшісіне 12 қарашада Көкшетаудағы ойын-сауық орындарының бірінде Красный Яр ауылының 22 жастағы тұрғыны өлтірілгенін растады.

Бұл факт бойынша полицейлер Қылмыстық кодексінің 99-бабының 2-бөлігі бойынша сотқа дейінгі тергеу амалдарын жүргізіп жатыр. Күдікті ұсталып, уақытша ұстау изоляторына қамалған.

Сонымен қатар жанжалға қатысқан тағы 6 адам анықталып, ұсталған. Оларға қатысты Қылмыстық кодекстің 293-бабы (Бұзақылық) бойынша сотқа дейінгі тергеу жүргізіліп жатыр.

"Біз бұл фактілер бойынша мұқият және объективті тергеу жүргізілетініне кепілдік береміз. Тергеу барысы басшылықтың назарында", - деді өңірлік полиция департаменті бастығының орынбасары полиция полковнигі Бақтияр Өтекин.