Түркістан облысында дәретхана шұңқырына құлап кеткен бала қалай құтқарылды (видео)

Түркістан облысының құтқарушылары дәретхана шұңқырына құлап кеткен баланы аман алып қалды деп хабарлайды KAZ.NUR.KZ тілшісі облыстық төтенше жағдайлар министрлігіне сілтеме жасап.

23 қаңтар күні "112" қызметіне Түркістан облысы, Ордабасы ауданы Темірлан елдімекеніндегі үйлердің бірінде тереңдігі 4 метрлік дәретхана шұңқырына 2016 жылғы туған бала құлап кеткені туралы хабарлама түскен.

"Құтқару жұмыстарына Түркістан облысы төтенше жағдайлар департаментінің 5 қызметкері мен медициналық жедел жәрдемнің 3 маманы жұмылдырылды. Құтқарушылар сағат 14:14-те шұңқырға құлап кеткен баланы арқанның көмегімен шығарып, жедел жәрдем қызметкерлеріне тапсырды. Бала дәрігердің тексеруінен кейін үйіне жіберілді. Қазіргі уақытта баланың жағдайы тұрақты", - делінген ведомствоның хабарламасында.

Осы орайда төтенше жағдайлар министрлігі ата-аналардан және ересектерден балаларды қараусыз қалдырмауларын сұрайды.

Мәтіннен қате тапсаңыз, бізге жазыңыз