Павлодар облысында жоғалып кеткен әйелдің денесі қар астынан табылды

Бүгін Павлодар облысындағы "Тұрсын" шаруа қожалығының маңында 16 сәуірде хабар-ошарсыз кеткен Екібастұз қаласының 34 жастағы тұрғынының зорлық-зомбылық белгілерінсіз денесі қар арасынан табылды, деп хабарлайды Polisia.kz ақпараттық медиа-порталы Telegram-дағы ресми арнасында.

Порталдың жазуынша, қазіргі таңда полиция қызметкерлері жұмыс істеп жатыр. Оқиғаның мән-жайы мен себептері анықталуда.

"Осы жылдың 16 сәуірінде Бесқауға ауылының тұрғындары ВАЗ-2104 автокөлігімен дала алқабына жоғалып кеткен ірі қара малды іздеуге кеткен болатын. Сағат 19.00 шамасында жұбайы көлікке оралып, әйелін күте бастады. Әйелі оралмаған соң, ер адам полицияға жүгінді", - делінген хабарламада.

ІІМ мәліметінше, полиция жедел-іздестіру іс-шараларын жүргізген. Іздестіру-құтқару жұмыстарын жүргізу үшін үш техника жұмылдырылған. Төрт іздеу тобы, оның ішінде Екібастұз қаласының полиция бөлімінің жеке құрамы, ТЖМ қызметкерлері, еріктілер және жергілікті тұрғындар іздеу жұмыстарына атсалысқан.