Павлодар облысында трактор жүргізушісі атқа мінген адамды басып кетіп, мерт қылды

Павлодар облысында бір тәулікте адамдар қаза тапқан екі жол апаты орын алды. Бірінші жол-көлік оқиғасы бойынша атқа мінген ер адамды трактор жүргізушісі басып кетіп, мерт қылды. Екіншісінде Toyota Land Cruiser жаяу жүргіншіні қағып кеткен, деп хабарлайды KAZ.NUR.KZ облыстық полиция департаментінің Instagram-дағы парақшасына сілтеме жасап.

24 желтоқсанда Белов-Қалқаман автожолының 18 километрінде Toyota Land Cruiser - 100 маркалы автокөлігінің жүргізушісі жаяу жүргіншіні басып кетті. Тұрғын алған жарақаттарынан көз жұмды.

"Сол күні Баянауыл ауданы Қызылтау ауылдық округінің жазық даласында МТЗ-92 маркалы трактордың жүргізушісі мас күйінде алдыңғы күрегімен жұмыс істеп жатқанда өтіп бара жатқан атқа мінген адамды қағып кетті. Апат салдарынан ер адам алған жарақаттарынан сол жерде қаза тапты", -делінген хабарламада.

Павлодар облысы ПД баспасөз қызметі жол-көлік оқиғалары бойынша тергеу басталғанын, көлік құралдары мамандандырылған айыппұл тұрақтарына қойылғанын мәлім етті.

Мәтіннен қате тапсаңыз, бізге жазыңыз