Алматыда үш баласы бар отбасы газдан уланып қалды

Алматы қаласы "Шұғыла" ықшамауданында үш баласы бар отбасы жылыту пешінің жабылмауы салдарынан көмірқышқыл газына уланып қалды. Бұл жайлы төтенше жағдайлар департаментіне сілтеме жасаған KAZ.NUR.KZ хабарлайды.

15 ақпанда сағат 13:40-та Алматы қалалық төтенше жағдайлар департаментіне жедел медициналық қызметтен Наурызбай ауданындағы Шұғыла ықшамауданында бір отбасы көмірқышқыл газынан уланғаны туралы хабарлама келіп түскен.

Алдын ала болжам бойынша, оқиға көмірмен жылыту пешіндегі амортизатордың жабылмауы салдарынан орын алған.

"Отбасы мүшелерінің, оның ішінде үш 3 баланың жағдайы тұрақты. Ересектер ауруханаға жатқызудан бас тартты. Бірақ балалар дәрігерлердің бақылауында. Олардың өмірі мен денсаулығына қауіп төніп тұрған жоқ", - деп хабарлады төтенше жағдайлар департаменті.

Төтенше жағдайлар департаменті осы аптада, дәлірек айтсақ, 12 ақпанда Наурызбай ауданы төтенше жағдайлар департаментінің қызметкерлері бұл отбасымен жылыту маусымында қауіпсіздік ережелерін сақтау жөнінде түсіндірме жұмыстары жүргізілгенін атап өтті.

Мәтіннен қате тапсаңыз, бізге жазыңыз