Петропавлда суға батып кеткен баланы іздеу жұмыстары бесінші тәулік жалғасып жатыр

Петропавлда өзен суына батып кеткен 10 жастағы баланы іздеу жұмыстары бесінші тәулік жалғасып жатыр. Қайғылы оқиға өткен жұмада болған, оны иірім тартып кеткен. Бұл туралы "Астана" телеарнасы хабарлады.

Өткен жұмада Петропавлдағы Есіл өзенінде төрт бала ойнап жүрген. Бір сәтте олардың бірі иірімге түсіп, жоғалып кеткен. Бұл туралы оның бауыры айтып берген. Баланың денесі бесінші күн іздестіріліп жатыр. Іздестіруге 50-ден астам құтқарушы, ерікті мен полиция қызметкерлері жұмылдырылды, су және әуе дрондары тартылған.

"Баланы қатты ағын су иірімге тартып кетті. Інісі оның көз алдында суға батып кетті деп айтуға болады. Іздеу шаралары әлі жүріп жатыр. Бұл қиын, өйткені су тасқынынан кейін су өте лас", - дейді СҚО ТЖД Азаматтық қорғаныс басқармасының аға офицері Әлібек Боранбаев.

Еске салайық, оқиға туралы бірнеше күн бұрын белгілі болған. 2014 жылы туған баланың суға батып кеткенін ересектерге оның бауыры мен достары айтып берген.