Қостанай облысында алты баланың әкесі бетон араластырғышқа құлап көз жұмды

Қостанай облысындағы кірпіш зауытында жұмысшы бетон араластырғышқа құлап, қаза тапты. Бұл дерек бойынша полиция сотқа дейінгі тергеу жүргізіп жатыр, деп хабарлайды "ТоболИнфо".

Қайғылы оқиға Қостанай ауданының Садовое ауылында болды. Өңірдің полиция департаменті кәсіпорындардың бірінің аумағында 60 жастағы жұмысшы автоматтандырылған бетон араластырғышқа құлағанын мәлімдеді.

Ер адам алған жарақаттарынан оқиға орнында қайтыс болды. Қазір тәртіп сақшылары еңбекті қорғау ережелерін бұзу фактісі бойынша сотқа дейінгі тергеу жүргізіп жатыр.

Басылымның хабарлауынша, марқұмның артында 6 баласы қалған.

ҚР ҚК-нің 156-бабының 3-бөлігіне сәйкес, қауіпсіздік техникасы, өнеркәсіптік санитария ережелерін немесе еңбекті қорғаудың өзге де ережелерін бұзу, осы ережелерді сақтауды ұйымдастыру немесе қамтамасыз ету бойынша міндеттер жүктелген, абайсызда адамның өліміне әкеп соққан адам жасаған, 5 жылға дейінгі мерзімге бас бостандығын шектеуге не сол мерзімге бас бостандығынан айыруға жазаланады, үш жылға дейінгі мерзімге немесе онсыз белгілі бір лауазымдарды атқару немесе белгілі бір қызметпен айналысу құқығынан айырылады.

Мәтіннен қате тапсаңыз, бізге жазыңыз