Таразда оқушының зорлануы: Тоқаев қала әкімін қызметінен босатуды тапсырды

Қазақстан президенті Қасым-Жомарт Тоқаев Тараз қаласының әкімін қызметінен босатуды бұйырды. Мемлекет басшысы мектеп оқушысының сабақ кезінде даладағы әжетханада зорлануы оқиғасынан кейін осындай шешімге келген деп хабарлайды KAZ.NUR.KZ.

Қоғамды дүр сілкіндірген жағдайдан кейін президент Жамбыл облысының әкіміне тапсырма берді.

Сонымен қатар, Тоқаев өзінің Twitter-дегі парақшасында өңір басшысына ескерту жасағанын жазды.

"Жамбыл облысының әкіміне Тараздағы 12 жастағы мектеп оқушысы зардап шеккен оқыс оқиғаға байланысты және жұмысында жүйелі кемшіліктер жібергені үшін Тараз қаласының әкімін қызметінен босатуды тапсырдым. Облыс әкіміне ескерту жасадым", - делінген хабарламада.

Естеріңізге сала кетейік, бұған дейін Таразда жетінші сынып оқушысының дәретханада зорланғаны туралы хабарланған еді. Алдын ала мәліметтерге сәйкес, мектеп оқушысы 12 жаста.

Полицейлер ауыр қылмыс жасаған күдіктіні ізін суытпай құрықтады. Оқушыны мектеп дәретханасында зорлаған азаматты анықтауға бейнебақылау камералары көмектескен.

Ұсталған ер адам 38 жастағы үйленбеген, бұрын ұрлық жасағаны үшін істі болған азамат болып шықты. Ол Тараз қаласындағы тергеу изоляторына қамалды.

Артынша күдіктінің осыдан бірнеше бұрын қыз зорлау фактісі бойынша сотталғаны анықталды. Ол төрт жыл түрмеде отырып, бір жылын шартты түрде өткізген.

Жантүршігерлік жайттан кейін мектеп директоры мен тағы үш қызметкер жұмыстан босатылды.

Сондай-ақ, елді дүрліктірген оқиғадан соң бірнеше полиция қызметкері жазаланып, мектеп инспекторы да қызметінен шеттетілген.

Оған қоса, облыстық білім басқармасының басшысы да өз еркімен қызметінен кетті.

Мәтіннен қате тапсаңыз, бізге жазыңыз