Атырауда Қазақстандағы ең қарт тұтқынның бірі бостандыққа шықты

Атырауда есірткі сатқаны үшін 11 жылын әйелдер түзеу колониясында өткізген 64 жастағы әйел адам бостандыққа шықты деп жазады Ақ Жайық.

Басылым мәліметінше, Жамбыл облысының тумасы Рабиға Тараз қаласында есірткі сатқаны үшін 2010 жылы қолға түсіп, сот үкімімен 15 жылға сотталып, мүлкі тәркіленген.

Темір торға тоғытылған соң Қазақстанның түрмелерінде жазасын өтеп, кейін Атырау облысы бойынша қылмыстық-атқару жүйесі департаментіне қарасты УГ-157/11 мекемесіне жеткізілді.

64 жастағы әйел бірден Тараздағы үйіне қайтып, туыстарымен кездесетінін алға тартты. Содан кейін өзі түрмеде болған кезде дүниеден өтіп кеткен туыстарының бейітіне құран бағыштамақ.

"11 жылда көп нәрсе жоғалттым. Жасаған қылмысыма өкінумен болдым. Қартайған кезімде немере-шөберемді ойнатудың орнына, қылмыс жасадым. Мекеме қызметкерлері мені тәрбиелеп, дұрыс жолға салды. Қалған өмірімді тыныштықта өткізгім келеді", - дейді бостандыққа шыққан Рабиға.

Ал УГ-157/11 мекемесі басшысының орынбасары Медет Аджикуловтың айтуынша, ҚР ҚПК сәйкес жазасын өтеуші 2021 жылдың наурыз айында мерзімінен бұрын шартты түрде бостандыққа шыққан.

Оған қажетті құқықтық-әлеуметтік көмектер көрсетіп, күтіп алуға туыстары шақырылғаны белгілі болды.

"Жаза өтеу барысында мекемеде тәртіпті болып, құқықбұзушылықтармен көзге түскен жоқ. Әрі қарай ол туралы мәлімет Жамбыл облысы бойынша ҚАЖД жіберілді", - дейді ол.

Қазір зейнеткерлік жасқа келіп қалған әйел жұмыс істемейді, әрі қарай оған қажетті көмек көрсетілмек.

Айта кетейік, бұл әйел адам - еліміздегі қарт сотталғандардың бірі.

Мәтіннен қате тапсаңыз, бізге жазыңыз