Қорғаныс министрлігі департаментінің басшысы 20 мың АҚШ доллары көлемінде пара алды деп күдіктелуде

Қорғаныс министрлігі департаментінің басшысы жемқорлық дерегі бойынша күдікке ілінді, деп хабарлайды Сыбайлас жемқорлыққа қарсы іс-қимыл агенттігі Telegram-дағы ресми парақшасында.

Ведомствоның мәліметінше, Сыбайлас жемқорлыққа қарсы қызмет еліміздің Қорғаныс министрлігінің құрылымдық бөлімшесінің басшысына қатысты сотқа дейінгі тергеп-тексеруді бастаған.

"Қорғаныс ведомствосының ақпараттандыру департаменті бастығының м.у.а. бейнеконференцбайланыс жабдығын жеткізу мерзімдерін бұза отырып, қабылдау-тапсыру актісіне кедергісіз қол қойғаны үшін жеткізушіден 20 000 АҚШ доллары сомасында пара алды деп күдіктелуде", - делінген хабарламада.

Агенттіктің хабарлауынша, күдікті ұсталып, Астана қаласының тергеу сотының санкциясымен қамауға алынған.

"Тергеу жалғасуда. Тергеу мүддесі үшін өзге ақпарат жария етуге жатпайды", - деп қосты Антикор өкілдері.

Мәтіннен қате тапсаңыз, бізге жазыңыз