Алматы полициясы көлігінде "от жаққан" жүргізушіні ұстады (видео)

Жеңіл көлігіне ағашпен жағылатын пеш жасап алған алматылық зейнеткер айыппұл төлейтін болды, деп хабарлайды Polisia.kz.

Көлік құралын пайдалану ережелерін бұзған жүргізушіні анықтауға бағытталған тексеру шаралары аясында Алматы көшелерінің бірінде көлік иесі машинасының артқы жағына пеш орнатып алғаны белгілі болды.

Көлікті 1955 жылы туған Л.есімді азамат басқарған.

"Автокөлік жүргізушісі салонның ортасына ашық отты пеш жасап, екі жағына газ баллондарын орналастырған. Мұндай көлікті басқару – ең алдымен, оның иесіне, жолаушыларға және басқа да жол қозғалысына қатысушыларға қауіп төндіретіні анық", – дейді Алматы қалалық ПД жергілікті полиция қызметі басқармасының бастығы Ержан Ұзабаев.

Тәртіп сақшылары әкімшілік заңнамасына сәйкес шаралар қабылданғанын айтты. ӘҚБтК-нің 590-бабы 7-бөлігі бойынша материал жинақталды. Көлік мамандандырылған айыппұл тұрағына қойылды.