ШҚО-да көші-қон бастығы шетелдіктердің елде жүріп-тұру мерзімін ұзарту үшін пара алған

Шығыс Қазақстан облысында көші-қон қызметінің бастығы шетелдіктердің елде болу мерзімін ұзарту үшін олардан пара алып отырған, деп хабарлайды ҚазАқпарат.

Сыбайлас жемқорлыққа қарсы іс-қимыл агенттігі ШҚО бойынша департаментінің мәліметінше, көші-қон саласындағы талдау барысында бірқатар заңбұзушылық анықталған.

"Атап айтқанда, жұмыс визасын алу және шетелдіктердің жүріп-тұру мерзімін ұзарту кезінде пара алынғаны белгілі болды. Анықталған сыбайлас жемқорлық тәуекелдерін жою бойынша нақты ұсыныстар әзірленді. Облыстық көші-қон полициясы басқармасының бастығына қатысты қылмыстық іс тіркелді. Сот үкімімен ол кінәлі деп танылды", – дейді департамент басшысы Денис Шакенов.

Өскемен қалалық сотының шешімімен айыпталушыға 10 млн теңге көлемінде айыппұл салынған. Сонымен қатар, ол мемлекеттік қызметте, жергілікті өзін-өзі басқару органдарында, Ұлттық банкте және оның ведомстволарында, қаржы нарығын және қаржы ұйымдарын реттеу, бақылау және қадағалау жөніндегі уәкілетті органдарда өмір бойы жұмыс істей алмайды.

Мәтіннен қате тапсаңыз, бізге жазыңыз