Алматы облысында лауазымды қызметкер мемлекет қаражатын жымқырды деген күдікпен ұсталды

Алматы облысының Мәдениет және архивтер, құжаттама басқармасының басшысына және басқа да тұлғаларға қатысты сотқа дейінгі тергеу амалдары жүргізілуде. Бұл туралы Сыбайлас жемқорлыққа қарсы іс-қимыл агенттігінің облыстық департаменті мәлім етті, деп хабарлайды KAZ.NUR.KZ.

Агенттіктің мәліметінше, лауазымды қызметкер бюджет қаражатын қолма-қол ақшаға айналдырып, өз қалауымен пайдаланды және жымқырды деген күдікке ілінген.

"30 сәуірде мемлекеттік орган басшысы Іле аудандық тергеу сотының санкциясымен қамауға алынды. Сотқа дейінгі тергеу жалғасуда", - деп хабарлады ведомстводан.

Жемқорлыққа қарсы қызметтің ақпаратынша, қылмыстық-процестік кодексінің 201-бабына сәйкес сыбайлас жемқорлыққа қарсы күресушілер тергеу мүддесі үшін өзге мәліметтер жарияланбайды.

Айта кетейік, Сыбайлас жемқорлыққа қарсы іс-қимыл агенттігі "ҚР Денсаулық сақтау министрлігі Санитарлық-эпидемиологиялық бақылау комитетінің Ұлттық сараптама орталығы" Жетісу филиалының директоры пара берді деген күдікке ілінгенін хабарлаған едік.