"Бетін талап тастаған": Қостанай облысында үш жасар қызға питбуль шабуыл жасады

Желіде үш жасар қызға питбульдің шабуыл жасағаны туралы ақпарат пайда болды. Полиция бүлдіршінге иттің шабуыл жасағанын растады, деп хабарлайды KAZ.NUR.KZ Telegram-дағы ІІМ жаңалықтары ресми арнасына сілтеме жасап.

Үш жасар қызға ит шаубыл жасағаны туралы ақпарат Telegram-дағы EGOV. PRESS арнасында жарияланды.

Хабарламада автор оқиғаның Тобыл қаласында болғанын атап өткен. Сондай-ақ жарияланымда питбуль тұқымдас иттің үш жасар қыздың бетін талап, бүлдіршіннің ауруханаға ауыр жағдайда түскені айтылған.

Автордың жазуынша, ерні мен беті жыртылған қыз балаға шұғыл түрде хирургиялық ота жасалған, қазір оның жағдайы қанағаттанарлық.

Желіде тараған бұл ақпаратқа қатысты Қостанай облысының полиция департаменті пікір білдіріп, Тобыл қаласында үш жасар қызға иттің шабуыл жасағаны туралы фактіні растады.

Полицияның мәліметінше, аталмыш фактіге қатысты Қылмыстық кодекстің 114-бабы "Денсаулыққа абайсызда зиян келтіру" бойынша сотқа дейінгі тергеу басталған. Ит иесі анықталған.