"Мылтықпен атқан": Алматы облысындағы жаппай төбелестен жасөспірім көз жұмған

Кеше Алматы облысындағы елдімекенде үйлердің бірінің ауласында 17 жастағы жасөспірімнің денесі табылған. Полиция оқиғаға қатысы бар деген күдікпен бірнеше адамды ұстады, деп хабарлайды ІІМ ресми жаңалықтары Telegram-дағы арнасында.

Ведомство дерегінше, 5 тамызда Алматы облысы Еңбекшіқазақ ауданы Бәйдібек Би ауылындағы үйлердің бірінің ауласында зорлық-зомбылық белгілерімен 17 жастағы жасөспірімнің мәйіті табылды.

"Жасөспірімді мылтықпен атып, ол жарақаттан қаза болғаны анықталды. Мылтық ұсталғандардың бірінің әкесіне тиесілі. Қазіргі уақытта 9 күдікті УҰИ-на қамалды, бұл факт Қылмыстық кодекстің 99-бабы 9-тармағының 2-бөлігі,14-тармағы бойынша аудандық полицияда тіркелді және сотқа дейінгі тергеу басталды", - деді Алматы облысы ПД бастығы Бауыржан Әленов.

ІІМ мәліметінше, түнгі сағат 12-де жастар арасында төбелес болып, қатысушылардың бірі атыс жарақатын алып, қайтыс болғаны анықталды.

Облыс ПД бастығының айтуынша, қазіргі уақытта сот-медициналық сараптама тағайындаумен барлық қажетті тергеу шаралары жүргізілуде.

"Басқа қатысушыларға қатысты Қылмыстық кодекстің 293 - бабы бойынша қылмыстық іс қозғалды, бұзақылық" - деп нақтылады Әленов.

Мәтіннен қате тапсаңыз, бізге жазыңыз