Жыныс мүшесі зақымдалған: Павлодарда сүндеттелген бес жасар бала шұғыл ауруханаға түсті

Павлодарда 5 жасар бала сүндеттелгеннен кейін ауруханаға түсіп қалды. Бұл туралы Қазақпарат агенттігі хабарлайды.

Қазір ол Астанадағы "Ана мен бала" орталығына жеткізіліп, хирург операциялардан шеттетілді,

Анасының айтуынша, олар баланы 23 тамызда облыстық ауруханаға әкелген. Қалыпты саналатын процедура жоспар бойынша өтпеген: дәрігер баланың жыныс мүшесінің үштен бір бөлігін кесіп алып тастаған, зәр шығару каналы зақымдалған.

Ата-ана жағдай туралы әлеуметтік желіде жариялады. Айтуларынша, бөлім меңгерушісі дәрігердің қателігін мойындаған.

Ал Денсаулық сақтау басқармасы оқиғаның мән-жайына қатысты әзірге түсінік бере алмайтынын мәлім етті. Аталған факті бойынша комиссия құрылып, қызметтік тексеру басталған. Ал 5 жасар баланы тәжірибелі дәрігер сүндеттегені белгілі болды.

"Медициналық және фармацевтикалық бақылау комитеті Павлодар облыстық департаментіне осы жағдай бойынша жоспардан тыс тексеру бастау үшін хат жолданды. Осы отаны жасаған маманның 13 жылдық қызмет өтілі бар, сондай-ақ "Балалар хирургиясы" мамандығы бойынша бірінші біліктілік деңгейі бар. Қазіргі уақытта дәрігер операция жасаудан шеттетілді", - деп хабарлады денсаулық сақтау басқармасынан.

Қазіргі уақытта бала Астанадағы "Ана мен бала" орталығының урология бөлімінде ем қабылдап жатыр. Оның жағдайын дәрігерлер тұрақты деп бағалап отыр.

Мәтіннен қате тапсаңыз, бізге жазыңыз