Түркістан облысында 5 жасар қызды зорлап, өлтірген ер адам өмір бойына сотталды

Шымкенттегі тергеу изоляторында өткен көшпелі сот отырысында Түркістан облысында 5 жасар қызды зорлап, өлтіру оқиғасы бойынша сот үкімі жарияланды, деп хабарлайды KAZ.NUR.KZ.

Сот мәліметінше, айыпталушы кінәлі деп танылып, химиялық кастрациямен қоса өмір бойына бас бостандығынан айырылды. Сондай-ақ одан 100 миллион теңге моральдық шығын өндірілетіні хабарланды.

Еске салайық, 13 шілде күні Түркістан облысы Сарыағаш ауданының тұрғыны полицияға 5 жасар қызының жоғалып кеткені туралы арызбен жүгінген еді. Жедел-іздестіру шараларының барысында қыз баланың денесі ауыл тұрғындарының бірінің үйінен табылған болатын.

Аталған дерек Қылмыстық кодексінің 99-бабы ("Адам өлтіру") бойынша тіркеліп, сараптама тағайындалды.

Кейін бұл оқиға туралы мемлекет басшысы Қасым-Жомарт Тоқаев та хабардар болып, Бас прокуратура мен Ішкі істер министрлігіне қайғылы жайттың мән-жайын мұқият тексеруді тапсырды.

Сондай-ақ бұл оқиға бойынша Бас прокуратура мәлімдеме жасап, іс бақылауға алынғанын хабарлады.

Мәтіннен қате тапсаңыз, бізге жазыңыз