"Бір-біріне тас, шөлмек лақтырған": Ақтауда полицейлер жаппай төбелестен кейін 76 адамды ұстады

27 қазан күні Ақтауда тас жолдың бойында төбелес ұйымдастырды деген күдікпен 76 адам ұсталған, деп хабарлайды ІІМ ресми сайты Polisia.kz.

Ведомствоның хабарлауынша, әлеуметтік желіде бір топ жасөспірім бір-біріне тас, шөлмек бөтелкелер лақтырып, төбелескен сәтінің видеосы тараған. Оқиға Ақтау қаласы 27-ші және 28-ші ықшамауданның ортасындағы тас жолда болғаны анықталған.

"Оқиға орнына полиция қызметкерлерінің жасағы барып, Ақтау қаласы полиция басқармасына 15-18 жас аралығындағы 76 адам жеткізілді.

56 кәмелетке толмаған баланың ата-анасына қарсы Әкімшілік құқық бұзушылық туралы кодекстің 442-бабы (Кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде немесе тұрғынжайдан тыс жерде болуы) бойынша әкімшілік хаттамалар толтырылып, жауапқа тартылды", - делінген хабарламада.

Сондай-ақ ведомство Қылмыстық кодекстің 293-бабы (Бұзақылық) бойынша қылмыстық іс қозғалып, 6 адамға бұлтартпау шарасы қолданылып, қамауға алынғанын атап өтті.

Мәтіннен қате тапсаңыз, бізге жазыңыз