Қаржы пирамидасын ұйымдастырды деген күдікті Түркиядан Қазақстанға экстрадицияланды

Маңғыстау облысының полиция департаменті қаржы пирамидасын ұйымдастырды деген күдікпен халықаралық іздеуде болған 32 жастағы Қазақстан азаматын Түркия Республикасының аумағында тұтқындады, деп хабарлайды Polisia.kz ақпараттық медиа-порталы.

Медиа-портал мәліметінше, ер адам облыс тұрғындарын қаржы пирамидасына тартқаны үшін іздестірілген.

"Ол Oceans Enterprise компаниясының атынан әрекет ететін алаяқтық топты ұйымдастырушылардың бірі болды. Алаяқтар әлеуметтік желілерде салымшыларды тарту үшін Smart Trade Сoin деп аталатын криптовалютаны сатып алу арқылы жылдам ақша табу мүмкіндігі туралы ақпаратты таратумен айналысты", - деп жазылған басылымда.

Ведомство мәліметінше, сотқа дейінгі тергеу барысында 60-тан астам жәбірленушіден өтініш түскен. Ал алданған азаматтарға келтірілген шығын көлемі – 212 млн теңге.

"Қазақстанның Түркиядағы елшілігімен тығыз қарым-қатынас жасалып, нәтижесінде ол Астана қаласына жеткізіліп, қамауға алынды", - делінген медиа-порталда.

Мәтіннен қате тапсаңыз, бізге жазыңыз