Түркістан облысында әкімдіктің лауазымды қызметкерлері ұсталды

Түркістан облысының прокуратурасы Төле би ауданы әкімдігінің лауазымды тұлғаларына қатысты тергеуді бастады. Оған себеп — ауданның арнайы жер қорындағы жерлерді заңсыз актілерді рәсімдеу арқылы аса ірі мөлшерде алаяқтықпен иелену фактісі. Бұл туралы облыстық прокуратура баспасөз қызметіне сілтеме жасаған KAZ.NUR.KZ хабарлайды.

Ведомство мәліметінше, қылмыстық іс бойынша ауданның жер қатынастар бөлімінің басшысы, өзінің қызмет бабын пайдалана отырып, осы бөлімнің бұрынғы басшысымен алдын ала сөз байласу арқылы нарық құны 326 млн теңге тұратын 200 га астам құнарлы жер учаскелерін заңсыз рәсімдеді деген күдікке ілінген.

"Түркістан облысының сотқа дейінгі тергеп-тексеру басқармасымен күдікті тұлғалар уақытша ұстау изоляторына қамалды. Қазіргі таңда аталған қылмысқа басқа да тұлғалардың қатыстылығын анықтауға бағытталған тергеу әрекеттері жүргізіліп жатыр", - делінген прокуратура хабарында.

Еске салайық, кеше Түркістан облысы әкімі Дархан Сатыбалды қала әкімдігінің екі қызметкеріне қатысты қылмыстық іс қозғалғанын растаған еді.

Әлеуметтік желідегі жарияланымдарда қала әкімдігінің лауазымды тұлғалары құқық қорғау органдарының назарына іліккені айтылған. Олар электрмен жүретін көліктерді жалға беріп, жеке шоттарға ақша аударған деп айыпталып отыр.

Мәтіннен қате тапсаңыз, бізге жазыңыз